ചിതറിയ ഒരു ഓര്മ്മക്കുറിപ്പ്
ആ മുത്തശ്ശിയമ്മൂമ്മയെപ്പറ്റി
എന്താണ് എഴുതേണ്ടത് എന്ന് അറിയില്ല. പക്ഷെ ഏതൊക്കെയോ പാതിമുറിഞ്ഞ ഓര്മകളില്
നിന്നും വാക്കുകള് കൂടെക്കൂടെ കൈവിരലുകളിലെക്ക് എത്തിച്ചേരുന്നു, വേനലില്
മരങ്ങളുടെ വേരുകള് തേടി ജലകണങ്ങള് എത്തിച്ചേരുന്നത് പോലെ. ആ മരങ്ങളുടെ ജീവനിലൂടെയാണ്
പിന്നീട് അവയുടെ തുടര്ച്ച..
ഒരുപാടുകാലമൊന്നും
ഞാന് ആ മുത്തശ്ശിയമ്മൂമ്മയെ കണ്ടിട്ടില്ല. ചെറുപ്പത്തില് കഥകള് പറഞ്ഞു
തന്നതിന്റെയോ മറ്റോ ഓര്മകളും
ഉണ്ടായിരുന്നിട്ടില്ല .പക്ഷെ എന്നിട്ടും ചില ആളുകള് വെറുതെ നമ്മുടെ മനസ്സിനെ
ചുറ്റിപ്പിടിക്കും. വെറുതേ; വെറുതേ തന്നെ.
അവസാനത്തെ
ഓര്മയില് ആ അമ്മ, പൊട്ടിയ ഓടുകള്ക്കിടയിലൂടെ
വെള്ളം വീണു നനഞ്ഞ ഇറയത്തു നിന്നുമുള്ള നോട്ടത്തില് , ഒരു പഴയ പലകക്കട്ടിലിലെ
വളഞ്ഞു കൂടി ശാന്തമായുറങ്ങുന്ന രൂപമായിരുന്നു. ഇടക്കെപ്പോഴോ ഉണരുമ്പോള് “ ആരാണ്
കുട്ടീ ? ഒന്നും ഓര്മ്മല്ല്യാ.. “ എന്ന് ആംഗ്യത്തോടെ മുറിഞ്ഞു മുറിഞ്ഞു പറയും.
ആദ്യത്തെ ഓര്മ്മയില്, കൂനിയിട്ടെങ്കിലും
മുളവടികുത്തിയുള്ള അവരുടെ വേഗത്തിലുള്ള നടപ്പും, കൊയ്ത്തുപാട്ടുകളും, പേരറിയാത്ത
ഏതൊക്കെയോ നാട്ടുചെടികളും ആണ്.
തിരുവിതാംകൂറില് നിന്നും മലബാറിലേക്ക്
കുടിയേറിയ വലിയൊരു കുടുംബത്തിന്റെ ഗൃഹനായികയായിരുന്നതിന്റെ, ആ ഒരു വെട്ടിപ്പിടിക്കലിന്റെ,
കാലഘട്ടത്തിന്റെ പ്രൌഡി അപ്പോളും അവര്ക്കുണ്ടായിരുന്നു.
ഇടയിലെപ്പോഴോ അവരുടെ കണ്ണുകള് വിദൂരതകളിലേക്ക്
പിന്വാങ്ങിയതായി തോന്നിയിരുന്നു. ചോദ്യങ്ങള്, ഉത്തരങ്ങള് എല്ലാത്തില് നിന്നും.
കാലം അവരെ ഏതാണ്ടൊരു നിഗൂഢബന്ധനത്തിലാക്കിയത് പോലെയാണ് തോന്നുക. ഒരുപാട് കാലങ്ങള്,
വര്ഷങ്ങള്, ഋതുക്കള് , മനുഷ്യര്, അനുഭവങ്ങള്, കാഴ്ചകള് ഇവയെല്ലാം
കഴിയുമ്പോള് നിശബ്ദതയുടെ ഒരു തമോഗര്ത്തം
കടന്ന് വീണ്ടും ഒരു പുതിയ തുടര്ച്ചയുടെ
ഭാഗമാവാന് മനുഷ്യന് ആഗ്രഹിക്കില്ലേ ?? വീണ്ടും ഒരു കുഞ്ഞാകുവനുള്ള മോഹം, പൂക്കളാകുവാന്, പക്ഷികളും ചിത്ര
ശലഭങ്ങളും ആകുവാന്.. ആ ആഗ്രഹം മനുഷ്യനില് മടുപ്പുണ്ടാക്കാറില്ലേ??
പക്ഷെ അവരുടെ കണ്ണുകളില് ആ മടുപ്പിനേക്കാള് ഒരു നിറം മങ്ങിയ ശാന്തതയായിരുന്നു, ദീര്ഘനിശ്വാസങ്ങളില്ലാതെ,
കാലത്തിന്റെ ആ ബന്ധനത്തിനുള്ളില് അവര് ശാന്തയായിരുന്നു, കൂടെയുള്ള കണ്ണികള്
പലവയും പിരിഞ്ഞുപോയെങ്കിലും, ചേരാന് കൂട്ടാക്കാതെ പുതിയവ പലതും അഴിഞ്ഞും തിരിഞ്ഞും
നിന്നെങ്കിലും ആ കണ്ണുകള് അപ്പോഴും വിദൂരതയിലെ ഏതോ ശാന്തികുടീരങ്ങളില്
സ്വസ്ഥമായി വിശ്രമിച്ചു .
ഒരുപക്ഷെ പുതിയ ഒരു തുടര്ച്ചയിലേക്കുള്ള യാത്രയുടെ തയ്യാറെടുപ്പിലായിരുന്നിരിക്കാം...
Comments
Post a Comment